Fushata “Kosovo, The Young Europeans” ka fituar çmimin për brendingun më të mirë për kategorinë Kombi dhe Vendi më i mirë në ceremoninë e shpërndarjes së çmimeve M&M 2010 (Media & Marketing).

Një njoftimin për media bëhet e ditur se në praninë e 750 mysafirëve dhe profesionistëve më eminent nga e gjithë bota e reklamimit, ministri i Ekonomisë dhe Financave Ahmet Shala pranoi shpërblimin në emër të Qeverisë së Kosovës në gala ceremoninë e organizuar të enjten në Grosvenor House në Londër.

Të 5 fushatat tjera në listën e ngushtë ishin nga Afrika e Jugut, Londra, Dubai, Bahreini dhe Madrid, ndërsa fushata për kombin/vendin më të mirë është kategori e re për vitin 2010, e krijuar për të njohur rëndësinë në rritje të fushatave ndërkombëtare të marketingut të krijuara për qeveritë kombëtare që promovojnë kombin e tyre në arenën botërore.

“Juria kanë qenë posaçërisht të impresionuar nga koncepti i shfrytëzimit të rinisë së Kosovës dhe nga aktivizimi shumë i mirë i kampanjës. Sipas jurisë, kampanja kishte natyrë vërtet të këndshme intriguese, dhe krijoi një sens të vërtetë optimizmi dhe përkrahjeje”, thuhet në njoftim.

David Kosmin, i cili e udhëhoqi projektin në “Saatchi & Saatchi”, tha se janë të mahnitur nga rinia kosovare dhe të ngazëllyer se në një periudhë kaq të shkurtër kohore përpjekjet e brendingut kombëtar të Kosovës kanë marrë vlerësimin më të lartë në arenën ndërkombëtare.

“Të zgjidhemi si më të mirët në kategori është një nder i veçantë por më me rëndësi, është një përkushtim për më shumë angazhim në vitet në vijim. Së bashku me PR Solutions, partnerët tonë vendorë, projekti i brendingut të Kosovës ka qenë një sfidë e shkëlqyeshme për ‘Saatchi & Saatchi’ sepse ne kemi brenduar një shtet të ri”, tha Kosmin.

Ekrem Tahiri, drejtor ekzekutiv i “PR Solutions”, partnerë lokal të “BBR Saatchi & Saatchi” ka theksuar se fushata “Evropianët e Rinj” është një projekt i rëndësishëm kombëtar që avancon shumë qëllime strategjike të Kosovës.

Ndryshe, fushata ka pas për qëllim ta ndërrojë imazhin e vendit nga kujtimet e së kaluarës te mundësitë e së tashmes dhe potencialeve për të ardhmen. Kosova ka moshën mesatare më të re nga të gjitha vendet evropiane. Mosha mesatare në Kosovë është vetëm 25 vjeçare, derisa te kombet më të mëdha evropiane është më afër 40.

Μου αρέσει! 4